【明報專訊】唔少人上北京都會擔心空氣唔好甚至出現霧霾，全國政協常委唐英年近日喺北京出席兩會會議，身上都夾住一個小裝置，原來係隨身嘅空氣淨化器（箭嘴示）。唐唐話自己唔係擔心有霧霾所以帶住呢部機，而係有朋友見近期係流感高峰期，所以送咗呢個小型空氣淨化器畀佢，部機無任何氣味，聲稱係日本製造，可以淨化裝置1米範圍嘅空氣，部機可以用到1個月喎。唔知唐唐呢部機係咪真係有用啲，定係人大代表羅范椒芬早排送畀記者用嘅港產納米口罩勁啲呢？