【明報專訊】立法會前主席曾鈺成噚日去咗石硤尾美荷樓，同一班即將要考DSE嘅中學生分享成長經歷。佢話童年時同屋企人及親戚共20人，住喺西環嘅舊樓，當年未有電視機，更無智能手機，每日最大享受係聽收音機，同埋落街踢波，仲試過踢波踢中晾衫竹，令到啲衫跌晒落地，佢哋成班細路都要快啲「匿埋」返屋企免畀人鬧。

自爆童年踢波踢冧晾衫竹

曾鈺成話父母非常緊張佢嘅學業，除咗要做晒功課，媽媽更要求佢每晚背熟每日喺學校學到啲乜，先准瞓覺，「絕大部分時間讀書都好枯燥，畀屋企人監住」；但到小五、小六突然發覺英文好有趣，於是開始有學習動機。佢又分享當年學業以外，參加過童軍小狼隊，除咗學識紮營、生火呢啲技能，最重要學識點同其他人合作相處，令佢終生受用。

佢話之後領悟到，無論學業、體育定玩樂器等，都要經過「由被動到主動」嘅階段，如果要有所成就，當中必定有沉悶艱苦嘅學習過程，佢又分享睇過一本書，話每個領域有成就嘅人都經過「1萬小時」努力，仲引述佢有好深體會嘅一句「學問之道，勞而不獲者有之，未有不勞而獲者也」，勉勵學生努力。唔知佢講緊嗰本書係咪就係暢銷作家Malcolm Gladwell嗰本Outliers呢？