【明報專訊】民建聯蔣麗芸（Ann姐）噚日毋懼「烏煙瘴氣」，花千幾蚊買炸雞、薯蓉同汽水，請記者喺立法會會議廳外嘅走廊享用，令一眾行家大飽口福。體育、演藝、文化及出版界議員馬逢國早前曾經形容記者喺走廊食嘢「唔健康，唔衛生，亦唔係好好睇」，Ann姐又擔唔擔心被投訴「有礙觀瞻」？Ann姐好有信心話唔會，因為自己食嘢姿勢「好靚」，又幫記者講說話，覺得記者喺立法會有採訪職責在身，邊做邊食係合理嘅。