【明報專訊】啟德郵輪碼頭對開嘅海面噚日好熱鬧，有團體搞咗個觀塘水上運動嘉年華2016活動，有獨木舟、龍舟及賽艇等活動玩，落場划艇嘅包括工聯會立法會議員鄧家彪。阿彪以前係中大划艇隊隊長，但最鋒利嘅刀都有生鏽嘅一日，阿彪噚日著住件划艇隊字樣嘅Tee，喺岸上玩划艇機，1分鐘拉到290米距離，而佢好坦白話以前中大入隊最低要求係拉300米，咁即係未達標喇。不過，阿彪久疏戰陣仍有咁嘅成績都算唔錯。