【明報專訊】立法會雖然休會兩周，但因《2014 版權（ 修訂） 條例草案》出現嘅戰事未結束，民主黨議員黃碧雲上周兩晚去反對條例嘅集會，都被部分示威者包圍指罵，事後碧雲喺facebook同熱血公民開火，大鬧「熱狗」同黃毓民搞事，有人騎劫咗個集會。碧雲同Emily講，鍵盤戰線搞手本身係熱血時報主持，而上周主持集會時都唔係好公道，佢根本無機會講民主黨立場，所以除非集會無畀人騎劫，否則佢唔會再出席，費事畀人乘機「抽水」，亦費事搞到有人受傷。