【明報專訊】公民黨黨魁梁家傑噚日卸任「泛民飯盒會」召集人，搞咗個傳媒茶敘同大家分享過去工作點滴。傑哥開場白就向記者道歉，話過去一年有時「比較躁」，有咩得罪大家，希望大家多多包涵。不過，噚日傑哥似乎對前黨友湯家驊（Ronny）唔係好客氣，話說Ronny亦有去泛民集思會開會，但Ronny一入房就走番出嚟，指梁家傑話未到佢嘅議程，所以請佢出去。Ronny行出房時，不禁話「即係唔當我係泛民啫」，最後由民主黨何俊仁請Ronny返去開會。