【明報專訊】貓貓狗狗，都有大佬的。一群貓，一群狗，必有一隻靚仔有型的，做大佬，食就食先，一眾跟班，走在牠後頭。做慣大佬，很難放下身段。馬仔簇擁，吃飯有人點菜，上車有人開門，這個時候，大佬坐穩一哥寶座，儀態會特別優雅，氣量十足，大仁大義，胸襟闊可撐船。但若出現第二個大佬，爭一日長短，身旁馬仔唔知跟邊個好，六神無主之際，很容易出事。大佬地位受威脅，大氣度變小家子氣；挑戰者唔夠班猶自可，夠班的話，不放大佬在眼內，窒頭窒勢，大佬的風度就馬上瓦解，老羞成怒，愈看愈不順眼。