【明報專訊】商務及經濟發展局長蘇錦樑（Greg So）噚日帶埋副局梁敬國、政助陳百里，第一次「齊腳」同傳媒茶敘，局長帶埋太太整嘅芝士蛋糕同行家分享。講到近期好hit、觸及新界原居民丁權題材嘅《竊聽風雲3》，有份睇首映嘅Greg So唔單止激讚扮鄉紳嘅演員「好似」，仲講笑咁話應該拍番套「特區政府版」，Emily就梗係八卦追問想搵邊個演佢自己啦，局長話由細到大都畀人話似一個演員，就係人稱大哥嘅鄧光榮，不過大哥已經過身，就算開拍都演唔到啦。