【明報專訊】佔領中環發起人之一戴耀廷最近「轉行」！今次佢唔再做揸住掃帚嘅校工，而係做「婚姻顧問」，肩負起拉攏𠵱家四分五裂嘅泛民、等佢哋可以復合嘅任務。戴耀廷噚日去珠海學院出席一個政改論壇時，話泛民出現內部分歧嘅情况，就好似一對差唔多要離婚嘅夫妻。佢話作為佔中發起人之一，就好比一個婚姻顧問，要將大家不同嘅訴求拉番一齊，務求令佢哋有復合機會。