【明報專訊】今年兩會厲行節約，港區人代雷添良就大讚好。佢話，以往各部委及省市代表鍾意趁兩會宴請港區代表聯誼交流，朋友邀請唔去又唔畀面，佢上年最高紀錄係一晚走三場，仲話有啲代表跑場次數比佢多。阿Tim話，咁樣真係好浪費，因為每處坐一陣打招呼就趕住走，浪費食物及宴會金錢，但今年省市宴請幾近絕迹，佢可以輕鬆啲，又唔使飲咁多酒。