【明報專訊】呢排唔少人追看無綫新劇《天與地》，之所以鍾意，並非為啲男女主角有幾靚仔靚女，而係覺得今次編劇總算寫咗啲針對香港社會問題嘅對白。好似日前果集講到喺電台做咗30幾年嘅Dr Dylan，因為佢只一味播啲老歌，台長嫌佢嘅節目收聽率跌而請佢走，Dylan冷眼旁觀香港，就話﹕「你睇吓我哋呢個世界，睇吓我哋呢個城市係乜嘢樣，除咗錢呢個字之外，我地已經分辨唔出是非黑白，我哋每個人都被環境訓練到，好似倒模出嚟咁。鍾意食同一樣嘅嘢、鍾意同一樣電視節目、支持同一種政治立場、信奉同一種生老病死嘅做人方法，this city is dying, you know？」呢段對白噚日就喺網上瘋傳，大家都讚講得好，講出香港嘅問題喎。