【明報專訊】政府總部噚日舉行「愛心食肆賞你惠食」計劃啟動禮，將透過社署長者中心，向5萬個獨居、雙老同隱蔽長者派發由5間飲食集團提供嘅餐飲優惠券，每人5張，由大年初一（1月29日）起，憑券可以用25元享用餐廳嘅指定招牌菜，例如麥當勞嘅魚柳包餐。

政務司長陳國基喺啟動禮話，舊年參加完長者活動，一直想為獨居、雙老長者送暖，想佢哋食好啲，於是同飲食界立法會議員張宇人討論，對方好爽快「拍心口」話聯絡飲食集團，促成今次計劃。陳國基又話，獨居、雙老同隱蔽長者人際支援網絡比較弱，希望計劃為佢哋送暖，鼓勵佢哋參與社區生活。佢又話今次計劃由政商民跨界合作，希望先試行再改善，期望未來有更多食肆參與。

今次參與計劃嘅飲食集團包括大快活、大家樂、太興、美心、香港麥當勞，佢哋噚日有派代表出席啟動禮，據佢哋講，指定招牌菜包括咕嚕肉飯、焗豬扒飯、叉燒煎蛋飯、海南雞飯同魚柳包餐。