【明報專訊】因應新冠疫情自2020年停運、去年正式結束歷史任務嘅城際直通車，有望事隔5年再次同公眾見面。Emily聽到，九廣通KTT列車部分車卡將會成為紅磡站「站見」鐵路展嘅新展品，預計最快下星期四（23日）隨展覽重開展出，有鐵路迷噚日凌晨亦影到港鐵將其中3卡KTT列車由火炭何東樓車廠開去紅磡站月台。

參觀要網上預約 重開首日已爆滿

港鐵暫時未公布相關資料，不過Emily發現，立法會網頁已透露咗先機，立法會交通事務委員會後日（17日）將會參觀「站見」鐵路展新增展品開幕儀式，相信到時港鐵或會公布參觀安排。

目前「站見」展覽需要網上預約登記先可以入場，港鐵喺啱啱過咗嘅星期六（11日）起至22日，以「場地保養」為由暫停開放「站見」展覽，不過其後日子嘅網上預約就仍然開放。Emily噚日上網睇過，展覽重開嘅首日（23日）同周末（25及26日）預約已經爆滿。睇嚟KTT列車開放參觀，又會成為鐵路迷圈子嘅「盛事」。