【明報專訊】嘉道理農場暨植物園有隻非洲灰鸚鵡，除咗羽毛係灰白色，就連眼珠都係，唔講仲以為係呢個品種嘅特徵，實情係患咗白內障。呢隻「視障鸚鵡」叫彤彤，今年27歲，𠵱家住喺嘉道理農場嘅鸚鵡護理中心。中心噚日喺社交平台話，正為彤彤籌備白內障手術，預計手術後彤彤可以有多10年命，呼籲市民捐款支持，令彤彤「重見光明」。

患病變沉寂 難飛需餵食

中心話彤彤一向性格活潑，會成日吹口哨同飼養員互動，仲同伴侶鑼鑼共築愛巢。殊不知前年9月彤彤患上白內障，隨住視力減退，彤彤唔止變得沉寂，減少同鑼鑼或照顧者嘅互動，仲有飛行困難，連喺樹枝上平衡都唔得，只可以喺地面活動，要中心安排特別餵食。

中心話捐款將會用喺完成白內障手術、提供手術後護理等。想幫助彤彤嘅市民可以瀏覽中心網頁，睇睇捐款詳情。