【明報專訊】工聯會權益委員會噚日公布「2024年十大勞工新聞」，其中3單同強積金有關，最多人關注嘅係「取消強積金對冲，工會促盡快落實為低收入人士代供強積金及推出保證回報產品」，有785票。工聯權委主任丘燿誠話，舊年《財政預算案》曾承諾研究推出「有穩建回報且手續費低」嘅強積金產品，不過至今仲未見影，希望新一份財政預算案會公布相關細節。

工聯盼推低手續費積金產品

十大勞工新聞選舉喺舊年12月下旬以問卷形式進行，超過1000名市民選出心中最關注同有代表性嘅勞工新聞，第二及第三位嘅新聞分別係「最低工資落實『一年一檢』，引入『可加不減』調整新機制」及「建造業欠薪事件頻生，工會要求審視建造業發薪機制」，分別有598及576票。

近排有多宗建造業欠薪新聞，建造業總工會權益及投訴主任吳偉樑話，工會舊年處理近200宗個案，當中逾半涉欠薪，雖然立法會早前通過《建造業付款保障條例》，禁止「先收款、後付款」等不公平付款條款，但認為當局未來仍要密切留意執行情况，切實保障工友權益。