【明報專訊】農曆新年好多人會買新衫，不過買二手衫就更環保。太古地產同聖雅各福群會第二年推出「裳在童心」計劃，回收同義賣二手童裝，推動環保。佢哋下星期五（17日）起一連3日喺鰂魚涌海濱社區休憩空間「舍區」舉行義賣同樂日。

呢個計劃今年收到嘅二手童裝數量翻倍，超過1.2萬件，經過整理分類後有超過6000件會義賣，收益全數撥捐聖雅各福群會社企Green Little，用嚟推動兒童環保教育同婦女就業。

主辦單位話，今年活動由藝人黎諾㦤同關心妍擔任星級店長，帶領一眾義工小店長服務顧客。到時義賣嘅二手童裝尺碼由初生嬰兒至12歲都有，以20元起發售。

下星期五中午12點義賣開始，到傍晚7點，之後兩日義賣兼同樂日就由中午到傍晚6點。主辦單位同超過20個團體合作，舉辦小丑互動體驗、舞動樂巡遊等，家長仲可以帶小朋友參加環保賀年工作坊，製作竹編揮春、再造紙利市封。「裳在童心」去年第一次舉辦，義賣同樂日有5000多人次入場，籌到約6萬元。