【明報專訊】今屆立法會最後一年任期已展開，而各個事務委員會（Panel）正副主席重新執位。不過，Emily聽聞今年各黨派協調比往年複雜，但唔少人至噚日之前，都唔知道18個委員會正副主席嘅最終名單，更有啲資深議員對今年協調有微言，話「分餅仔」過程欠透明。

各委員會正副主席提名聽日截止，各政治板塊嘅代表噚日都有聚頭，交代協調咗嘅人選安排，避免爭位。部分委員會將要大執位，例如衛生事務委員會，原主席陳凱欣做咗一年就讓位，佢話如果由副主席林哲玄出選會全力支持，覺得應該由業界代表、任職醫生嘅林哲玄做主席。

工聯會梁子穎又係做咗一年公務員及資助機構員工事務委員會主席就要起身，有機會轉去教育事務委員會任副主席；原教育panel副主席周文港料升做主席，而做咗3年主席嘅梁美芬去年雖曾表示有興趣留任，其後知道有人有意接任後，於去年底已表明會讓位。

有資深議員就話，唔係好明協調小組嘅揀人準則，有啲做一年主席就換位，有啲就做三年先換人。另有議員估計，協調工作由幾名資深議員及各板塊代表按大家報名意願分配，或者今年係最後一年會期，想畀多啲較新嘅議員試吓做主席、副主席。