【明報專訊】英國噚日開始實施新嘅電子旅遊許可（ETA），包括香港在內多個地區非英國國民入境或過境之前要申請，盛惠10鎊（約98港元），不過計劃一開始就有小甩轆。Emily留意到，英國政府嘅ETA系統顯示以特區護照申請唔符合資格，網頁英文顯示「你不能以中國香港特別行政區的護照申請ETA」，澳門特區護照都有類似情况。英國內政部回覆本報查詢話會積極檢討安排，盡可能免卻混淆。

澳門護照亦有類似情况

Emily實測過，如果以特區護照申請ETA，系統自動掃描後會將申請人國籍以及護照發出地標示為「中國」，如果嘗試填報「香港特區」，就會顯示唔符合申請資格，要繼續選填國籍同護照發出地係「中國」，先可繼續申請程序。

英國內政部話，ETA系統係按國際標準，喺申請人嘅護照讀取同核實國籍。不過，英方話留意到有香港護照持有人關注，當局會積極檢討、令關注者安心，盡可能免去任何可能混淆（wherever possible to remove any confusion）。不過截至噚晚7點，問題暫時仲未解決。