【明報專訊】本港零售市道不景氣，周圍都有吉舖，灣仔軒尼斯道一間吉舖外，唔止貼有招租告示，仲掛起聖誕裝飾同手寫聖誕祝福語，又用熒光色卡紙寫上「特平出租」等大字，然而天黑後，喺霓虹燈嘅映照下，尤其係門口兩邊藍底黑字嘅「對聯」，感覺就有少少陰森。唔通吉舖招租都要出奇招，一破死寂嘅市道？

連吉幾月 前租客抵唔住市道退租

與一般緊鎖鐵閘嘅吉舖唔同，呢間舖開晒閘，落地玻璃門望通間舖，店內擺放咗盆栽、桌椅，變咗做「招租接待處」。喺裏面靜待租客嘅李先生話，呢個舖位已幾個月無人承租，自己受親戚所託「擺檔」。據佢所講，上手租客經營印度貨品店，但貨品較小眾，亦因為抵受唔住市道差、租金高而退租。

李先生話地舖連閣樓共1600平方呎，以往月租至少10萬元起跳，𠵱家希望7萬至8萬元租出。佢認為「打開門口」更能吸引新租客內洽，之前以同樣方式出售過吉舖，認為效果唔錯，𠵱家擺咗檔約兩個多月，平均每日都有兩三個人查詢。

被問到門面嘅裝飾風格時，李先生笑住話係「聖誕風」，但就話自己都覺得有點兒哪個，「破天堂、破地獄都好，最緊要租得出！」