【明報專訊】本港零售、飲食業喺通關後生意一直難見起色，中小型企業聯合會最近結合中小商戶組成「小街道大聯盟」地膽推介計劃，推廣地區旅遊同帶動消費，第一站先喺中區推行，今個聖誕至農曆新年期間幫襯指定店舖，憑實體或虛擬優惠卡可有唔同優惠，計劃網頁仲有埋地圖，記低全部參與嘅商戶位置。

睇番商戶名單，大部分都係餐廳、酒吧、咖啡店，分別位於士丹頓街、伊利近街、嘉咸街、荷李活道、卑利街、永吉街、機利文新街等附近一帶，唔少消費有指定金額，折扣一般係九折，亦有店舖會有「贈品」，例如去麥奀記（忠記）等幾間食肆食嘢可有免費飲品。

商會盼模式拓至18區

中小型企業聯合會話，希望將以地區街道為單位嘅推廣模式，拓展到18區唔同街道及小區，支持中小企業。會長郭志華噚日喺計劃啟動禮話，希望透過計劃畀更多人認識中上環特色商店，增強社區凝聚力，幫助商戶提升業務。

有份出席啟動禮嘅商經局長丘應樺話，好開心商界同地區人士合作，展示地區特色，並通過商戶優惠吸引旅客同本地居民深度探索社區。