【明報專訊】第58屆工展會正喺維多利亞公園舉行，作為工商界政黨嘅經民聯當然要支持，主席盧偉國，副主席梁美芬、吳永嘉，以及副秘書長陸瀚民噚日一齊去掃貨，拎住一袋二袋餅乾零食及健康食品。梁美芬話逛工展會係兒時回憶，細細個爸爸帶佢行，會有波板糖食；又話自己𠵱家都係工展會常客，去年買嘅羽絨服又平又靚，今年就掃其他貨品。

陸瀚民就話，臨近聖誕節，多區都有舉辦市集，商場亦有唔少聖誕打卡位佈置。佢話特首李家超都呼籲大家留港消費，振興經濟，而佢有響應呼籲，今年同家人留港過節，會去發掘一下香港更多好玩精彩嘅活動。