【明報專訊】觀塘區七旬無牌鐘表修理工匠佘永盛（佘伯）近日終於攞到固定攤位（工匠）小販牌照（簡稱工匠牌），成為自行申請工匠牌第一人。協助佢申請牌照嘅義工、民間團體「活在觀塘」創辦人袁智仁戥佘伯高興，不過話佘伯既喜又憂，因為搬遷新址需時，擔心之前繼續經營會被檢控。

佘伯20年前起喺觀塘裕民坊擺檔，自2018年爭取牌照，今年9月獲觀塘區議會食物環境衛生委員會通過發牌，要求佘伯喺新址經營，新址位於駿業里行人天橋底旁行人路，攤位面積唔可以超過0.4乘0.5米。

要重做攤檔鐵箱 盼聖誕前後搬到

袁智仁話，由於要符合尺寸規定，佘伯要重做擺檔嘅鐵箱，預計要幾千元，期望聖誕前後可以去新地方擺檔，不過之前要繼續喺現有地方經營，希望食環署網開一面，理解佘伯已經盡快搬檔。

袁智仁提及，佘伯已經提前同新址附近嘅栗子檔主強哥打招呼，仲鼓勵埋強哥爭取小販牌。強哥父母喺觀塘炒栗子多年，但父母過身後佢未能繼承牌照，導致𠵱家未有小販牌。