【明報專訊】《破．地獄》電影熱潮掀起港人留意本地殯儀文化，但破地獄之外嘅喪葬儀式，大家又識幾多？康文署轄下嘅非遺辦事處今個月推出「發現非遺」系列節目，以「破‧解迷思」為題，介紹傳統喪葬儀式同南音兩項香港非遺項目，主講嘅就係為電影擔任喃嘸顧問嘅喃嘸師傅梁俊，活動費用全免，先到先得。

文化博物館連辦兩周日 免費入場

傳統喪葬儀式以土葬為主，主要包括「唸倒頭經、破地獄、買水、入殮、運財、辭靈、應紅宴、解穢酒」。講座分兩日，分別係下周日（15日）同再下周日（22日）喺香港文化博物館1樓劇院舉行。

有份指導電影中「文哥」（許冠文飾）揮桃木劍嘅梁俊，下個星期日下晝2點半至4點，先舉行「喃嘸先生——破解傳統喪葬儀式」講座，解構傳統喪葬儀式同背後意義；再下個周日下晝2點半至4點就會舉行「喃嘸先生——傳統喪葬儀式的引路人」講座，探究喃嘸先生喺儀式中嘅角色同意義。

另外，文哥同魏道生（黃子華飾）合唱嘅南音貫穿電影，本地藝團「一才鑼鼓」就會喺下星期六（21日）下晝2點至3點，喺香港藝術館1樓匯堂舉辦「涼風有信——南音說唱」，介紹南音的形式、歷史同文化內涵外，仲會演唱南音。