【明報專訊】生產力局噚日舉辦「粵港澳大灣區國際人工智能與機器人高峰會2024」，今年特別設置展示區，邀請咗5間參展商展示來自唔同地區嘅最新人形機械人技術，同埋點樣應用喺新興行業。創新科技及工業局長孫東噚日出席活動，仲同機械人握手𠻹！

今次高峰會以「人工智能與機器人助力新興產業發展：合作、創新與機遇」做主題。其中一間公司展示一部具有運動交流互動能力嘅機械人，並正同比亞迪、奧迪一汽及東風柳汽等車企合作喺車廠應用。

有公司就展示新一代高性能通用人形機械人，擁有55個「自由度」，最高關節扭矩達到400Nm（牛頓米），最高轉速達到25rad/s（弧度每秒），室外真實場景下嘅奔跑速度達到每秒3.6米（即時速約13公里），能夠拎物件、倒水、修剪花草，亦可以喺多種地形上穩定行走同奔跑等。

生產力局話，雖然人形機械人發展仍處於起步階段，但佢哋可以執行多項任務，減少空間需求，降低中小企成本，有助促進新型工業化發展，為大灣區經濟增長提供新動力。