【明報專訊】二手拍賣平台Carousell噚日首次發布《買得意：二手年報》，話「興趣及遊戲」類別係佢哋交易量第二高嘅二手物品分類，單係香港就佔近45%，尤其係每年暑假同動漫電玩節等活動期間，本港用戶對玩具嘅需求都會大升。年報話日本漫畫角色「Chiikawa」（圖）係香港第二大熱門搜尋關鍵字，超越傳統熱門嘅奢侈品牌同電子產品嘅搜尋量，而熱門搜尋首位係PS5，其餘係iPad、iPhone同Switch。

港用戶買賣年均賺6800元

本港用戶多喺夜晚搜尋、傾偈或交易，夜晚6點係交易高峰，9點同10點分別係物品刊登同搜尋、傾偈嘅高峰時段。報告又話，通過二手玩具嘅交易，香港用戶合計減少嘅碳排放相當於1291噸，等於2947次來回香港同東京航班嘅排放量。

Carousell年報又展示咗香港、台灣同東南亞用戶參與循環經濟嘅情况，其中本港用戶每年平均通過二手買賣賺6800元，交易額僅次於新加坡，反映平台對促進本地循環經濟有貢獻，唔止幫到用戶清理閒置物品，亦帶來經濟價值。