【明報專訊】政府近年力推過渡房屋，房屋局長何永賢早前到訪由東華三院營運、位於啟德嘅過渡房屋「啟德‧東寓」出席音樂會，當日除咗小朋友住戶有份表演，鋼琴家張勝量「牛牛」亦有露兩手。何永賢噚日喺facebook發文，話欣賞東華三院為小住戶提供學習機會，又希望住喺惡劣居所、仲猶豫緊嘅家長，「可以為自己的小朋友勇敢地踏出改變生命的一步，為他們開拓更多可能」。

何永賢喺帖文提到，雖然小朋友仲係初學階段，但每粒音符都畀佢聽到「正待開發的無限潛能，感受到社會各界對基層家庭的無限關懷」，又感謝牛牛喺「啟德．東寓」推動音樂義教，為小朋友提供免費音樂教育。

「啟德‧東寓」早前被揭發單位滲水，搞到牆身發霉，百戶單位受影響，負責營運嘅東華三院其後承諾會做好所有執修。