【明報專訊】城巴近排申請加價並話連續6年蝕錢，噚日就宣布經營「觀光城巴」品牌，投資3000萬元擴展開篷巴士車隊同升級設備，同時推出兩款觀光套票同手機App，乘客只要買咗套票就可於指定時間無限次上落全港城巴，行指定觀光路線並有導賞可以聽。城巴營運及工程主管龔樹仁話，城巴現時有九成收入靠常規票務，希望推出觀光巴士可開源，同時振興旅遊業。

城巴即日起增加開篷巴士車隊，由新冠疫情前嘅3架增至12架，最頻密可以8分鐘一班，連接本地逾50個景點。每架開篷巴最多可容納90人，有全景天窗同屏幕直播車外風景，方便輪椅人士。今次推出嘅兩款觀光套票售價320元同400元，分別有效48同72小時，後者包埋城巴機場快線同北大嶼山路線。

文體旅局長楊潤雄噚日出席活動揭幕禮時提到，今年頭10個月訪港旅客人次3670萬，按年增三成，相信觀光巴士結合智慧同深度遊，可提升旅客體驗。