【明報專訊】渠務署沙田污水處理廠喺上周六及周日舉行開放日，署方設五大主題展區，包括創新與機器人專區、可持續發展專區、研究及發展專區、防洪專區及污水處理技術專區。雖然喺污水廠內會聞到少少污水臭味，但有得近距離睇污水設施，活動吸引咗唔少家長帶同小朋友參與。

污水廠開放廠內巨型曝氣池、圓形嘅沉澱池等大型水缸，畀市民行樓梯登上缸頂，睇污水淨化、消毒去菌程序及過程，渠務署有專人導賞講解。有導賞員提醒市民，上到去缸頂，影相時隻手唔好伸咁出 話如果不幸跌咗手機入污水缸，保證執唔番！

處理廠目標2031年搬過對面山窿

渠務署並展示各種協助檢查、清理渠道嘅機械或機器模型，有展板介紹沙田污水處理廠搬到對岸女婆山岩洞嘅工程狀况，當局目標大約於2031年完成整項搬遷計劃，即係將來大家經過吐露港公路近中文大學附近，未必再聞到陣陣污水味，因為沙田污水廠已搬入山洞。