【明報專訊】近日天氣不穩，大學都如常繼續舉行畢業禮，而喺香港大學畢業禮中，見到律政司有兩名官員穿上畢業袍。副律政司長張國鈞讀咗幾年，完成港大公共行政博士（DPA）課程，其讀公共行政碩士（MPA）課程嘅政治助理陳倩雯（Nicole）就以優異成績（distinction）畢業。

政助陳倩雯distinction碩士畢業

張國鈞噚日喺facebook上載畢業禮相片，佢話作為父母，好多人都參加過仔女嘅畢業禮，佢就調番轉邀請囡囡參與佢嘅博士畢業禮，話台上台下角色對調，感覺有趣。張國鈞話，幾年前啱啱做咗行政會議同立法會議員無耐，就讀港大嘅公共行政博士課程，當時幾位教授都擔心佢工作太忙而走唔完DPA呢條路。

佢亦認同寫博士論文唔係一件易事，形容求學問過程猶如馬拉松般考驗意志和毅力，甚至要學會習慣孤單。張國鈞幸得名師指導，點名感謝博士論文導師卜約翰教授（John P. Burns）喺過程中嘅指導和鼓勵，對方對追求學問嘅嚴謹和認真態度令佢獲益良多。

張國鈞嘅前黨友、立法會議員鄭泳舜日前都穿畢業袍，完成教大嘅運動教練及管理社會科學碩士課程，佢話希望實踐書中學術理論，冀能為本港體育發展注入新活力。