【明報專訊】律政司長林定國噚日被請去廉署飲咖啡，所為何事？原來喺廉署北角總部地下大堂嘅咖啡廳「一九七四」開幕，林定國獲邀出席開幕禮，佢仲講笑話收到邀請要去廉署飲咖啡都嚇咗一嚇。

咖啡廳以廉署成立年份命名，今日起正式向公眾開放，場內賣咖啡同小食，咖啡選用來自雲南同「一帶一路」國家嘅優質咖啡豆，包括帶果味酒香嘅雲南咖啡、帶果香嘅埃塞俄比亞咖啡、帶果仁味嘅越南咖啡。

咖啡廳亦首次展出真實證物同用具，等大眾了解過往廉署重大案件同歷史，仲設置咗廉署招牌、霓虹燈等打卡位，希望吸引市民同旅客了解反貪工作。咖啡廳經招標後由保良局自負盈虧營運，收益歸機構做慈善，廉署就收取服務費當租金。

林定國喺開幕禮致辭話，「被請去廉署飲咖啡」深入民心，港人一般理解係去協助調查，但從今以後如果再有人話要請佢去廉署飲咖啡，就要反問對方係去地下定樓上飲。佢話以往一般人唔太想行近廉署總部，自己除非嚟開會，否則盡量都唔喺附近出現，但咖啡廳可以拉近廉署同市民嘅距離，有助推廣廉潔誠信文化。