【明報專訊】噚日朝早8號風球啱啱「落波」無耐，沙田區議員陳壇丹同羅婉珮就喺律師見證下結婚。陳壇丹同Emily講，原本打算去沙田婚姻登記處註冊，點知遇上打風，前一晚唯有臨時變陣，搵律師改去沙田婦女會嘅中心舉行儀式。佢話同一區議會已有區議員姚嘉俊、陳敏娟夫妻嘅「先例」，所以有向姚嘉俊請教點樣平衡私人生活同工作，對方建議佢適當時候要放低工作，「同埋要𧨾一𧨾老婆」，仲話有好多議員希望佢哋響應政府呼籲「三年抱兩」。

陳壇丹話噚日大概12點，即係三號風球懸掛緊嘅時候，喺律師、親友、區議員同事等見證下結婚，仲搵咗沙田前區議員彭長緯同黃戊娣做證婚人。

陳壇丹話自己係太太嘅大學師兄，兩人在學時開始拍拖，畢業後就同太太先後投身地區同婦女工作，有好多合作機會，加埋舊年雙雙當選區議員，感情愈來愈穩定，於是決定今年結婚。未來打算方面，佢話因為工作關係，暫時未有時間度蜜月，可能要下年先。至於有無生小朋友嘅打算，佢就話同太太都鍾意小朋友，希望有下一代，「到底會唔會有（小朋友）都睇緣分」。