【明報專訊】唔少人平時都會透過外賣平台叫外賣，工聯會立法會議員黃國噚日提出書面質詢，關注有公屋經常鎖押外賣速遞員嘅電單車，建議增設「外送專用電單車車位」。不過，房屋局長何永賢話，由於需要有效措施確保車位按指定用途使用，加上無額外空間，初步評估可行性較低。

黃指經常鎖押 何：情理兼備處理短泊

黃國話，近期粉嶺皇后山邨同山麗苑「加大力度」鎖押外賣速遞員電單車，又報警投訴電單車阻路，令速遞員需承擔鎖押費同告票罰款，建議當局喺新屋邨試行「外送專用電單車車位」，並仿效內地設立有休息與如廁空間嘅「速遞員驛站」。

何永賢書面回應話，目前公共道路車位一般不限用途，倘推出專用車位要配合有效措施，確保停泊車輛符合指定用途，又要防止車位遭長期佔用，且屋邨公共空間有限，設立專用車位嘅可行性較低。佢又話，房委會已豁免轄下所有屋邨少於半個鐘嘅泊車費，房署嘅屋邨亦會根據實際情况，對短暫停泊嘅速遞電單車「作出情理兼備的處理」。