【明報專訊】維園網球場日前舉行香港網球公開賽，實政圓桌立法會議員田北辰同家人都有去捧場睇女單決賽，但球手唔算世界排名最頂級，場館亦坐唔滿。田二少同香港公開賽賽事總監李娜傾過，呢位前大滿貫球手慨嘆話，維園網球場設施已舊，唔符合辦一級賽事嘅要求，如果香港要申辦計分嘅大型網球賽，就要更新硬件同配套。

李娜同田二少解釋，球手爭取世界排名就要參加計分賽，大滿貫賽事冠軍有2000分，次一級嘅大師賽有1000分，之後就係500分同250分嘅巡迴賽。維園網球場只有約3600個座位，規模最多只可以舉行250分嘅賽事，如果要舉行500分嘅賽事，場館一定要最少6500個座位，而目前亞洲可以舉辦到500分或以上賽事嘅場館喺北京、上海同東京。田二少話明白因為香港賽事分數少，所以難吸引最頂尖球手參賽。

田二少認同李娜嘅睇法，話香港既然想搞體育盛事經濟，大可考慮重建有40年歷史嘅維園網球場，又話以佢理解，網球總會好多年前已經同政府傾過重建維園網球場，但政府以善用資源為由無搞到。