【明報專訊】香港球迷鍾意睇英格蘭足球超級聯賽，而目前就由now TV獨市轉播，據網站資料，月費由240元起，但有人就會透過網上其他渠道收睇。now TV近日聯同英超賽會呼籲球迷唔好喺非法串流平台睇波，仲搵嚟一班球星，包括曼聯加拿曹、利物浦阿里遜、阿仙奴薩卡等，拍宣傳片呼籲「踢走盜版」。

有曼聯利物浦阿仙奴球星

英超總法律顧問Kevin Plumb透過新聞稿話，知道香港乃至亞洲球迷都好熱情，會捱夜睇波，但喺非法串流平台睇波極具風險，叫大家透過官方授權嘅轉播平台睇。新聞稿引述網絡安全專家Paul Watters教授嘅最新研究，顯示近24%嘅非法串流平台用戶可能面對惡意軟件嘅威脅，呢類平台又不時彈出廣告，用戶隨時受到惡意軟件同誤導式廣告威脅，又話喺侵權網站上，幾乎三分之二廣告都被標註為唔安全。

香港電訊個人業務市務及收費電視董事總經理蔡煒健就話全力支持英超嘅反盜版行動，又提到今年9月，海關突擊搜查樂富一個住戶，一對now TV用戶父子因為喺網上非法轉播英超比賽而被捕。