【明報專訊】立法會研究人口政策和措施小組委員會噚日開會討論鼓勵生育政策，多名議員建議別出心裁。工聯會鄧家彪建議喺政府內部營造生育氛圍，「所有政府辦公室，加多啲BB相嘅佈置，令公務員返工望到BB，就覺得好開心喎！」小組委員會主席梁毓偉就話，政府應該舉辦更多活動鼓勵青年「出pool」（指拍拖），然後「結婚生仔」。

鄧家彪話唔少人抗拒生育，需建立社會氛圍，等大家感覺小朋友好可愛，「（BB係）mini me（迷你的我）嚟嘅、『小鄧家彪』嚟嘅」。佢提出喺政府辦公室貼滿嬰兒相，公務員每日都見到「咁就唔好加班啦，返屋企陪吓老婆」。副勞福局長何啟明話自己都有喺辦公室貼BB相，認為建議創新，會與公務員事務局討論。

梁毓偉提議，仿效內地青年中心辦活動鼓勵青年聚會，問「可唔可以政府部門做先？」何啟明話公務員日常經常交流，「係咪要去到政府內部有交友活動？我哋帶返去，睇吓會唔會作為員工福利處理」，引來哄堂大笑。其他議員就希望加強宣傳教育，新民黨容海恩話最近問囡囡將來想唔想生小朋友，引述囡囡話唔想、話唔識照顧小朋友，佢認為學校應教育下一代生育係開心事。