【明報專訊】近年北角廉署總部成為內地旅客打卡點，但只有被邀到廉署協助調查嘅人或開放日參觀者，先至可以飲到「廉署咖啡」。廉署噚日喺社交平台推出短片宣傳《咖啡年華》，由廉政專員胡英明監修及廉署人員攝製，搵咗廉署社區關係市民諮詢委員會委員鄺美雲拍片。被問到廉署係咪即將開設咖啡廳，胡英明大賣關子，呼籲大家留意廉署社交媒體嘅最新消息。

專員賣關子 下周五「約定你」

短片取材自導演王家衛電影《花樣年華》，帶領觀眾重返舊時空。鄺美雲身穿旗袍，同由廉署人員扮演嘅男角色飲咖啡。鄺問對方：「如果有多一間Café（咖啡廳），你會唔會同我一齊去？」又喺片尾話下周五（15日）「約定你」，並喺信紙寫上「一九七四咖啡廳」，即廉署成立年份，同埋廉署總部地址「渣華道三零三號」，暗示會喺總部開咖啡廳。翻查資料，團結香港基金今年2月發表倡議報告，副總裁葉文祺建議設法吸引更多旅客來港，並將熱門打卡位包裝成可賺錢嘅景點，舉例喺廉署旁設咖啡店或手信店。