【明報專訊】各位嚟緊會去旅行嘅老友記留意喇，港鐵機場快線今日起至下月15日會推出樂悠咭半價優惠，老友記只需喺出入閘前到機場快線客務中心（唔包括博覽館）出示有效樂悠咭，就可以領取優惠，半價搭機場快線往返機場。半價後，由香港站、九龍站、青衣站往返機場車費分別係55元、50元同32.5元。

殘疾人照顧者11．10港鐵免費

另外，11月10日係「2024年國際復康日『殘疾人士免費乘搭車船日』」，當日殘疾人士同埋一個隨行照顧者可以免費搭港鐵，持有「殘疾人士身分」個人八達通或「殘疾人士身分」樂悠咭嘅乘客，可如常拍卡免費搭車，至於只持有「殘疾人士登記證」嘅人及隨行照顧者，就要去客務中心或資訊台出示證明文件，向工作人員說明目的地，再領取免費港鐵單程票。留意免費優惠唔包括東鐵線頭等及高鐵。