【明報專訊】律政司前司長袁國強離開政府後私人執業，近日就「重返」律政司幫手，擔任律政司轄下兩個工作組嘅成員。

林定國任兩小組組長

政府近年想推動香港做亞太區法律爭議解決中心，律政司成立新嘅「法律及爭議解決服務專家諮詢組」，除咗律政司正副司長林定國同張國鈞做正副組長，據政府公布，成員包括袁國強、大律師公會主席杜淦堃、律師會長湯文龍及前會長蘇紹聰等20多個法律界同專業界別人士。

另外，《施政報告》附篇提及規範調解專業認證同紀律事宜，並提出建議，律政司另成立「調解監管制度工作小組」，除正副司長，成員亦有袁國強份，另外仲有終審法院常任法官林文瀚，同埋亞洲排解爭端學院創辦人姚定國。

今次係袁國強離開政府後，少數擔任嘅政府諮詢委員會成員，對上一次係外匯基金諮詢委員會。佢本身仲擔任香港國際仲裁中心（HKIAC）聯席主席。

Emily留意到，律政司本身設仲裁推廣諮詢委員會，部分成員同上述專家諮詢組重疊。律政司口頭回覆話，仲裁推廣諮詢委員會職權已經納入新嘅專家諮詢組，前者已經完成任期喇。