【明報專訊】公務員事務局繼早前推出普通話問答比賽，再推一個歷史文化問答遊戲「宅茲中國」，有10條圍繞中國官吏制度、歷史文物、天文地理同語言文字等範疇嘅問題。其中問及宋代文學家蘇軾，佢曾經話自己與唐代文學家韓愈同病相憐，平生多招譭謗，因為二人生於同一命宮，亦即係同一星座，到底佢哋係邊一個星座呢？

Emily睇完呢10條問題，覺得如果對中華歷史文化有夠深入認識嘅話，要「全中」應該唔太難。其中一條比較易嘅問題就問到漢朝嘅選才制度，當時未有科舉制度，想有一官半職原來不一定要才高八斗，有另一個優點都有機會獲授官職；至於係咩優點，公務員事務局就提供4個選項，包括敏而好學、孝順父母、仗義疏財和克勤克儉。

每條問題答完都會即時有答案，仲有詳細解釋。至於蘇軾同韓愈嘅星座，喺蘇軾嘅《東坡志林》都搵到答案。遊戲網頁連結會放喺局方嘅facebook專頁，開放至下月29日。