【明報專訊】網上流傳上環一間花店喺店外貼出「公告」，話有狗主任由狗狗隨處大小二便後無清理兼態度惡劣，「我們將會在此處擺放毒物，請你的狗隻遠離，以免有任何意外」。事件惹起唔少人憤怒，有人仲話要報警。花店其後移除告示，話「僅此聲明，並未有在店外擺放任何毒物」，又話「多謝你的關注」。

已移除告示 稱無放毒僅想引關注

涉事花店「花生花華」被網民圍攻後，喺facebook專頁發文回應，話噚日早上職員喺店內勸喻一個狗主清理狗狗嘅小便，但狗主態度傲慢，兩人繼而口角。帖文又話，街上經常有狗糞，故以上述通告勸喻所有狗主清理，聲明未有喺店外擺放任何毒物。花店職員向網媒「香港動物報」話，店員要求狗主清理，對方豎中指反罵店員，貼告示只係想引起關注。

不過，事件並無因為花店解釋而平息，網民洗版式留言回應，有人話其實花店大把其他嘢可以做，例如噴啲狗唔鍾意嘅氣味喺門口，又例如用醋或者酵素清潔劑，反問點解要恐嚇人會毒狗。有網民亦話，如果真係放毒，流浪動物唔知道就會受害。有人就話，如果唔係講話放毒，反而會有唔少撐，鬧無公德心嘅人，但𠵱家花店咁回應就冇得原諒。