【明報專訊】六合彩噚晚攪珠結果同派彩引起熱話，呢期攪出5、18、21、24、44、47及特別號碼20號，7個號碼裏面有5個同上期中秋金多寶一模一樣，重複嘅係5、18、21、24及44號，而咁啱得啱橋，呢期有大量人中獎，獎金都分薄埋，二獎只派得3.84萬元！

三獎489注中 七獎5.3萬注

呢期頭獎一注中派彩800萬元，二獎1.5注中派彩3.84萬元，三獎就有489注中，每注亦只派彩1.92萬元；七獎更多達53,730注中，派彩40元。

據了解，呢期六合彩雖然有近500注中三獎，但馬會唔使「倒貼」，即係唔使喺多寶儲備撥款支付派彩。

有熟悉六合彩運作嘅馬會老友同Emily講，連續兩期攪出5個相同號碼，可謂有人歡笑有人愁，對於買中5個號碼（三獎）嘅幸運兒嚟講，可能仲可以話皆大歡喜，但二獎得主就真係只能苦笑，因為派得最低金額3.84萬元，而平時好彩嘅話，二獎派彩都會有幾十萬，甚至過百萬元。