【明報專訊】政府發展旅遊熱點工作組早前公布9個旅遊熱點，其中包括舉辦「維園市集」。康文署噚日宣布保良局為承辦維園市集（V Mart）嘅合作伙伴，今日起試行營運，設約30個攤位，涵蓋手工藝品等產品。Emily發現保良局上月底已開咗「V Mart」facebook專頁，首期聖誕市集有3間美食品牌及25間文創品牌參與，當中美食攤位費用以總收入25%作服務費，按金每日800元。

設喺維園噴水池廣場及南亭廣場嘅維園市集今日試運，之後逢周六、周日及公眾假期中午至夜晚9點開市，預計至明年11月底。睇番康文署7月嘅新聞稿，維園市集舉行時間係上晝10點至不超過夜晚9點。

fb專頁招募新春文創品牌

V Mart嘅facebook專頁提到，首期聖誕市集日期為今日至後日，以及本月20至21日，一共5日，有售棉花糖、手工飾物及鮮花等。現場除咗有多個巨型聖誕打卡裝置，本月20至26號亦會舉辦多場工作坊，包括粉彩聖誕卡及紙膠帶聖誕卡。另外，V Mart本周二亦發帖招募新春文創品牌，攤位同樣以總收入25%作服務費。