【明報專訊】巴黎奧運女子重劍金牌得主江旻憓成功再「轉跑道」，退役後任職馬會對外事務經理嘅佢當選新一屆立法會旅遊界議員，唔少人都關注佢會唔會專心議會工作，向馬會辭職或申請調職。Emily噚日問過馬會，佢哋話無進一步評論，但恭喜江旻憓勝選，而佢仲係馬會員工，放緊無薪假。

沿用競選海報發帖謝票

網民有睇好有盼「誠意搭夠」

江旻憓喺立法會選舉以131票擊敗取得23票嘅對手馬軼超。江旻憓前晚喺facebook發帖感謝旅遊業界同市民支持（圖），圖片繼續沿用佢競選時所用、以綠色同白色做主調嘅範本，同埋佢嘅半身相，上面仲印有「候選人」、「選舉廣告」字眼。

佢喺帖文話好榮幸當選，明白呢份信任背後嘅責任，承諾以務實進取嘅態度，擔當業界同政府之間嘅政策推動者同溝通橋樑，確保行業訴求得到「积极」回應，仲會推動具前瞻嘅旅遊發展策略。

佢又形容議員唔止係一份工，更係同全行並肩同行嘅使命，將會全力以赴，同大家共同開創香港旅遊業新篇章。帖文至昨晚吸引超過900個留言，唔少網民恭喜佢當選，有人希望佢「做啲實事給反對你的人看」，亦有人話佢「經驗唔夠，希望誠意搭夠」。