【明報專訊】荃灣海濱臭味存在廿幾年，主因係渠管錯駁，舊年政府話透過修復錯駁渠已改善八成，惟近期有市民反映臭味重臨。民建聯新界西南議員陳恒鑌噚日喺facebook解答，話臭味重臨係因為政府1月起開展清理箱型暗渠淤泥工程，涉及大涌道、大河道及馬頭壩道。

陳恒鑌話，政府已完成大涌道近排水口段嘅清理工作，現正清理馬頭壩道雨水箱型暗渠近排水口段、大河道箱型暗渠近大河道北段，預計本月底分階段完成。佢引述渠務署話，署方為緩解出水口隔泥幕內嘅臭味，會安排「吸缸車」汲取隔泥幕內嘅水體，清理工作完成後會逐一清除隔泥幕。

議員：用機械人加快清淤

陳恒鑌提到，政府仲引入科技加快工程，包括聲納探測船、沙井探測鏡頭、色粉測試工具等，又用到遙控清淤機械人做大河道箱型暗渠近大河道北段嘅清淤工作。佢又引述環保署話氣味濃度已減少逾九成，硫化氫平均濃度由2022年嘅36ppb降至今年1月嘅2.5ppb，舊年第四季嘅硫化氫平均濃度為3.4ppb，較第三季減少近半。