【明報專訊】愛爾蘭每年都慶祝聖博德日（St Patrick's Day），唔同部長都飛去世界各地見愛爾蘭社群，今年就係房屋部長James Browne嚟香港，佢並先後見過房屋局長何永賢、發展局同建造業議會代表等。

Browne喺愛爾蘭駐港總領事館酒會上話，兩地居住各有挑戰，盛讚香港建築技術好先進，好多嘢可「取經」。佢透露十幾年前學生時期坐火車由北歐到俄羅斯，經過中國，今日再踏足香港，覺得港人友善同溫暖猶在。

出席酒會嘅財政司長陳茂波話，舊年政府減烈酒稅，之後見到銷量增加四成，價值增加130%，相信愛爾蘭威士忌同釀酒廠可擴大版圖。佢又笑言自己都好鍾情愛爾蘭咖啡（Irish coffee）。

美國加關稅浪接浪，財爺都不點名話喺保護主義同關稅威脅下，更需要維持開放同友善營商環境，並期待同愛爾蘭喺人工智能同科技方面合作。