【明報專訊】立法會聽日將恢復二讀政府收番大欖隧道後嘅新收費條例草案，實政圓桌議員田北辰上個禮拜提修正案，建議欖隧非繁忙時段免費。會議未開，政府同田二少已連日「筆戰」，運輸及物流局之前向立法會交文件，話修正案會導致財赤同塞車，噚日再喺facebook發帖「拉票」，話新收費方案經過通盤考慮、有廣泛共識，唔點名話有議員提出嘅修正案，會令欖隧收入大減八成，導致營運上不可持續，呼籲一眾議員做「明智決定」，支持草案通過。