【明報專訊】男團ERROR成員郭嘉駿（193）前天（14日）35歲生日，外公在他生日前夕離世。十分傷心的193，前日在社交平台貼出小時候與外公合照，說那時因父母返工，有好長時間每日放學去公公婆婆屋企，食完晚飯才跟雙親回家。他稱以前一直覺得外公好犀利，身體好健康無病無痛周圍走，個腦轉得快，不時看財經炒股票，不過近一兩年公公身體狀况突然急轉直下。

193表示6年前入行，外公會看他的節目、劇集和報道，開始覺得終於可以令公公安心及自豪，「就算遇到什麼不開心與挫折，佢問起我，我都會話冇事，所有事好順利，不用擔心，直到真的掙到錢想請公公去旅行，才發覺他的身體條件已不許可」。他遺憾一直忙工作忽略了外公，以為還有很多時間，原來所有事都要愛得及時，「有時會責怪自己唔夠叻，如果我叻啲就可以喺頒獎台上面多謝佢，原來時間係唔等人，佢前兩日望住我話多謝我嚟探佢，我見到佢咁辛苦，真係好心痛，本身想話多謝佢一直以嚟咁惜我哋就真，不過因為唔想畀佢見到我喊，所以轉身行開咗，到噚日再去醫院，佢已經冇再郁過，我仲未來得及多謝佢，佢就已經走咗」。

娛樂組