【明報專訊】香港近年積極「搶人才」，但人才嚟到香港，求職可能遇到困難。協助人才落戶嘅香港人才服務辦公室提到，早前有位澳洲百強大學畢業嘅人才有求職困難，經人才辦轉介獲得專業意見，最後搵到工，去年底順利入職，近日仲同人才辦報喜，大歎「終於安心晒」。

人才辦話截至舊年年底，各項人才入境計劃共收到逾43萬宗申請，有逾27萬宗獲批，超過18萬名人才帶埋受養人來港。人才辦留意到有時人才對香港職場未必了解，求職未必順利，有時久久等唔到回音，難免忐忑不安。

其中一名畢業自澳洲百強大學嘅人才因為求職困難向人才辦求助，經轉介獲得專業求職意見，又參考人才辦網站每日提供嘅數千份招聘廣告，唔再藥石亂投，終於搵到工，做番佢專長行業嘅管理級職位。

求職者靠AI寫履歷 顧問籲多分享自己

人才辦現有約80個合作伙伴，為人才提供本地資訊同支援服務，今年會加到不少於90個。合作伙伴之一、專業人才招聘顧問公司Robert Walters話，留意到唔少求職者依賴生成式AI寫履歷表同求職信，建議佢哋唔好畀AI主導，多啲分享個人故事，會更突顯經驗同能力。