【明報專訊】打牌除咗食糊，仲可以食蝦餃燒賣！百年老字號蓮香樓最近同「麻雀館深度遊」合作推出「至尊版」活動，參加者去到香港蔴雀娛樂公司嘅麻將館，除咗可以了解麻將文化、玩問答遊戲同落場親身試打，仲可以食到蓮香樓點心餐，包括蝦餃皇、燒賣皇、山竹牛肉球、叉燒包、潮州粉果同特色春卷。

位於灣仔嘅香港蔴雀娛樂公司上年推出「麻雀館深度遊」公開團同私人團等，最近同蓮香樓聯乘推出「至尊版」，收費每人388元，朝早喺麻將館一邊食點心，一邊「實習」打牌，名額20人，比無點心食嘅「私人團」貴100元，而散客就可報名不定期舉行嘅公開團，每人228元。

另外適逢農曆新年，喺農曆正月參與麻雀館深度遊基本麻將課程可以獲得賀年版文憑，深度遊打卡位就會加設新年裝飾品。