【明報專訊】日前有網民喺社交平台Threads話，喺西區干諾道西對出嘅馬路，驚見路面應該係「堅尼地城」嘅白色字樣，竟然變成「坚泥地城」，批評路政署辦事「低質」。路政署噚日回覆Emily，話路面出現嘅錯字，其實係港燈公司喺現場做掘路工程，地面貼咗嘅臨時路面標記出錯，港燈噚日亦按佢哋要求更正。港燈回覆話喺干諾道西做緊電力改善工程，承建商重鋪路面時，工人誤用不正規字體貼標記，標示噚日朝早約10點已修正。

有網民話自己喺干諾道西近西隧口、中聯辦對出嘅馬路地面見到「坚泥地城」，呢度以前寫啱「堅尼地城」，並唔係一直以來都出錯。帖文引來唔少網民討論，有人聲言要向政府部門投訴，仲上載路政署聯絡電話嘅截圖，叫大家打去問下。

港燈回覆又話對事件可能引起嘅不便致歉，立即指示承建商修正之餘，亦有叮囑工程人員同承建商小心留意工程細節，避免再出錯。